مصر على أعتاب اكتشاف أثري يهز العالم.. توقعات بكشف يفوق مقبرة توت عنخ آمون فاجئ زاهي حواس خلال ندوة في معرض الشارقة للكتاب، الحضور بتلميح خطير عن اكتشاف أثري متوقع قريبآ في مصر، سيكون أهم من حدث القرن العشرين اللي تم فيه اكتشاف مقبرة توت عنخ آمون.. الحدث ده في تسريبات عنه مسبقة برضو من وزارة السياحة والآثار اللي أكدت إننا الشهر ده هنعلن في مصر عن كشف أثري ضخم.. كلام زاهي حواس بيقول إن الحدث بيدور حوالين كشف مقبرة عبقري مصر القديمة الطبيب والمعماري إمحوتب باني هرم زوسر المدرج اللي عمل نقلة في فن العمارة المصرية، وينسب إليه الكثير من تطوير المعارف في مصر القديمة. أهمية إمحوتب مش بس في إنتاجه العلمي الغير مسبوق، ده كمان في آثار أسست لتغيير مصر والعالم بعده. ماهو قبل ظهور إمحوتب مكنش في إنسان بيبني بالحجر ولا كان المصريين بيصنعوا أهرامات بدقة علمية وإعجاز زي اللي شوفناه بعد كده في معجزات الأهرامات المصرية.. ومعابد مصر المبهرة.. وبعد بناء هرم زوسر المدرج أول بناء هندسي كامل مبهر بالحجر تغيرت فنون هندسة العمارة وتطور سكن البشر للأبد.. إمحوتب المعماري العظيم كان كمان طبيب كبير.. أسس علم الطب في مصر، وبالتالي تأسيس تقدم الطب في التاريخ الإنساني.. هو بدون منازع كان أبو الطب اللي وثق عمليات ودون عن أمراض عصره وعلاجها، واخترع علاجات لم يسبقه فيها أحد.. إمحوتب اعتبروه المصريين بمثابة رمز دولة لا يقل عن الملوك العظماء، وجسدوه كآله الطب والشفاء والحكمة، ليصبح بأرثه المبهر المؤسس الحقيقي لتطور العلوم المهمة في مصر القديمة وعلى رأسها الهندسة والطب. أكيد حد بالأهمية والتاريخ ده، متخيل أسرار مقبرته هتكون إيه، وعظمة آثاره، وتفاصيل الكشف التاريخي الأثري عن إمحوتب.. لو حصل هيكون مزلزل إزاي ؟ في الحقيقة مكنش بيبالغ زاهي حواس لما قال إن لو اكتشفنا مقبرة إمحوتب، هتكون بالتأكيد لا تقل عن أهمية اكتشاف الملك توت عنخ آمون، حتى لو مكنتش على نفس مستوى الآثار ككنوز ذهبية، هتكون آثاره أهم على مستوى المعرفة بتاريخ الحضارة المصرية، اللي أسرارها من علوم ومعارف خلدت مع تاريخ شخصيات بقدرات و إرث إمحوتب.